Охридско-Преспанскиот регион се наоѓа на Балканскиот Полуостров, на тромеѓето меѓу Албанија, Грција и Македонија и се вбројува меѓу најголемите природни резервати во Европа. Досега, само во Охридско езеро се откриени 146 ендемични видови, додека тој број во Преспанските Езера е 39. Малото Преспанско Езеро е посебно познато како важен воден екосистем, погоден за исхрана и размножување на голем број водни птици. Флората  во регионот е претставена со над 1500 видови. Само во рамките на Национален парк "Галичица" може да се најдат 182 дрвенести видови.  

Охридско-Преспанскиот регион е сместен во Југоисточна Европа, на тромеѓето меѓу Албанија, Грција и Македонија (40^o43’ – 41^o2’N географска широчина; 20^o23’ – 21^o10’E географска должина). Регионот ги опфаѓа двете најстари езера во Европа, настанати пред 2-3 милиони години по тектонски пат на западните Динарски планини. Поради карстниот карактер на планината Галичица која ги раздвојува двете езера, големи количини вода од Преспанските Езера, преку подземни текови, се прелева во Охридско Езеро, преку бројните извори долж неговиот источен брег. Поради тоа, овие езера сочинуваат единствена хидролошка целина. Во текот на шеесеттите години од минатиот век, изграден е канал кој ги поврзува реката Девол и Малото Преспанско Езеро со што значително зе зголеми сливот на ова езеро, а со тоа  и на Охридско Езеро (види ја сликата подолу).